الله يرحمك ويرحم والديك ذاك الاغريقي الي گلت بزمانك الحلو:"شر البلدية ما يضحك".ولك لو تطلع من گبرك بقدرة قادر، وتجينه للعراق بهاي الأيام چان شبعت ضحك.جديات تشبع ضحك، الى أن عيونك تغورگ بالدمع، وبعد ماتعرف انت تضحك لو تبچي.لأن بلاوينه هواي، وكلها تموّتْ من الضحك.خلينا نسولفلك وحده من بلاوي تالي وكت:
عدنه أفقر محافظتين ببلادنا الي چنتوا تسموها بوكتكم بلاد ما بين النهرين، هنه الديوانية والمثنى.وهنه الاثنين أكثر من باقي المحافظات الي عاگبات ليوره،اجتمعوا بهاي الأيام المحافظين مالتهن، وكتبوا جوه صورهم:"محافظ المثنى يلتقي محافظ الديوانية، ويبحثان نقل تجربةالديوانية الى المثنى، وتبادل الخبرات."بروح أبوك وانت عشت گبل (٢٥٠٠) سنة، ويحسبوك فيلسوف زمانك تعقل انو الديوانية بزماننا هذا هلگد متطورة، وگامت تنطي خبرات تطورها للغير، وأهلها ما يدرون.لا تروح بعيد وتشيل غيبتنا يجوز الجماعة متقصدين يرجعوها ليوره اسنين علمود يسوها تراث، تستفاد منه الطلاب بدروس التاريخ.