گاعدين بالگهوة وجابو طاري النذالة، وبده واحد يگول شريكي بالمحل طلع نذل باگني، وآخر حجة عن ديون على صديق نذل نكرها عليه، وثالث إخته نذله باعت الورث بالوكاله الي مسويتها الها العائله وگامت بالدخل، نب حامد وگال:مو مثل دگة النذالة الي صارت بيَّ، وكمل: صديق العمر، الله ماوفقه بالدراسة، وراح يشتغل بالسوگ، علايمه يطگطگ، وماانگطعت علاقتنه أبد، تصوروا هواي من معارفنا عبالهم إحنه إخوان. بعد (٢٠٠٣) بطل شغله وراح ويه الأحزاب ما نعرف اشيشتغل، ومن اسئله يگول سياسة، الى أن جا يوم وإذا صاحبي وزير، فرحت ورحت للوزارة باركتله، وما أخفيكم گلت ويه نفسي بلكت أستفيد، الرجل رحب، وگام من كرسيّه وگعد يمي،وگال عود لا تغيب عني، وآني هم ما چذبت خبر وره اسبوع رحتله. سألني بيك حيل؟ جاوبته خليني على يمناك، وبدا يناوشني شغلات بيها خبزه، وآني هم أناوشه المقسوم بالنص.
فد يوم من الصبح خابرني مستعجل، وگال أرديدك تجيبلي اليومگبل الساعة (١٢) بالليل، مليون ونص دولار وتجيني للبيت.يمعود انطيني مجال فد يومين ما جوه ايدي كاش، گال أگلك اليوم أكو شغله وبيها خوش خبزه. والله ركضت وجمعت هالعندي بالبيت، وبعت ذهب المره، وتداينت من شركاء وياي بالشغل وأخذتله المبلغ بالجنطة بعد صلاة العشاء، صبح الصبح اتصلت عليه للوزارة طلعلي مدير مكتبه، گلي:ليش ما دريت مو طلع اليوم من الوزارة، وهسه أخوكم هاي چم سنه مرت ولحد الآن ما وفيت الدين الي عليَّ، ولا رجع الذهبات.