يگول جاسم احنه بالعراق والحمد لله تعلمنه التلغمط، ومن سألوه الگاعدين، وگالوله:اشتقصد بالتلغمط؟ضل يجيبها يمين ويوديها يسار، وگال:أقصد الى كتل هشام الهاشمي، تتذكرون القضية كبرت،والكاميرات صورت، والمسدس الحكومي انلزم والقاتل انكمش،واعترف وانحكم، لكنه انهزم، ومحد يدري إشلون انهزم.وتعرفون بعد كل هاي الهوسة، ومن بردت الشغلة رجع من الارجنتين أقصد إيران، وانعادت المحاكمة، نكر اعترافاته السابقة، لأنها انوخذت منه بالقوة وتحت التعذيب.هنا جاسم توقف عن الحچي اشويه، وفر راسة، وگال:ليش أكو واحد منعول والدين چان يگدر يمد ايده على هيچ متهم محترم ومحجوز بمكان محترم، حتى يجبره يعترف على شي مامسويه.المهم الرجل اتحاكم باليوم الي رجع بيه، وطلع براءة لعدم كفاية الأدلة، ويگولون رجع لشغله الأولي، لا من شاف ولا من دره.سكت جاسم اشوية للمره الثانية ورجع للسالفة وگال:هذا هو التلغمط، الي على أصوله.نب أبو جبار وگال ياله علويش متعجبين وشايلين هم، سرقة القرنمو تلغمطت، وغيرها وغيرها... المهم كثفوا الدعاء برمضان بلكت الله يچفينه شر التلغمط.