الحجي يسأل وكل أسئلة الحجي بيها إنّه، ويگول أگلك أشو صار ثلث أسابيع صنطه؟ما افتهمت؟لا تسوي نفسك غشيم، والله افتهمت ونص.ومع ذلك خليني أجاريك، أشو كل هاي المدة لا مسيرة طار تفوگ قوات الاستكبار، ولا صاروخ انفجر بالغلط يم المعسكرات الي بيها جنود الاحتلال، ولا بيكب إنلزم وبيه راجمات تشومر هناوهناك؟يمعود مبين ذيچ هي، مثل عين الشمس من صارت الحديدة حارة،وبدوا الامريكان، العفو (الاستكبار) يستهدفون الروس الكبار ونفذوا بالفعل، وگفوا كلشي.
لعد ليش ما وگفوا شغل المسيرات والصواريخ من چانوا الامريكان يضربون بس المقرات، وسيارات الحمل الي تنقل عتادو أرزاق، ويموت بيها بس أولاد الخايبات.هاي انت گلتها، ويبين منها بشريعتنا النضالية من يستشهدون ولد الخايبات وبس يستمر النضال، وهاي مو جديدة، لكن من تحمى الحديدة وتتهدد حياة الكبار فيتوقف كلشي حتى النضال، وتتغير الأهداف والأولويات وحتى الفتاوي والمساومات.يعني نگول ولد الخايبات ما الهم غير الله بهاي الدنيا.وداعتك ما الهم أحد إلا نفسهم، بس غير كون يفتهمون القصةويديرون بالهم على حالهم گبل ما يروحون بالرجلين.