يوميا واحدنه يقره عشرات التعليقات.ويشوف بگدها مرات ومرات من الڤديوات أشكال وأرناگ.ألطفها واحد معلق على تعليق يگول للناطق الرسمي لوزارة الزراعة، الي يبرر بيه ارتفاع أسعار اللحوم، ويأكد:أن الأسعار في عموم البلاد ارتفعت بسبب مجلس عزاء أقامه واحد من شيوخ تالي الوكت (طگ عطيّه)، يگولون ذابح بيه هذاالشويخ خمس تالاف راس غنم كل يوم.الرجل حسبها على كيفه، وگال يعني على مدى ثلث أيام الفاتحة،طلع الشيخ ذابح (١٥) ألف راس، وحتى يسدون العجز بالخرفان ويسيطرون على أسعار اللحوم في العراق العظيم، وخاصةبالشهر الفضيل رمضان، بادروا الربع باستيراد خمس آلاف خروف.وختم تعليقه هذا الطرفچي باستغراب يگول بيه لعد إذا مات برمضان فد شيخ أو شيخين، وهمه ما شاء الله هواي، اشلون راح تكفي هاي الخرفان المستوردة للمعزين.تره حقه صدگ اشلون راح تكفي؟وحتى لا تنحرج الزراعة وجهات الاستيراد اقترح عليها وگال:عمي بدل ما تدوخون روسكم بالاستيراد وتحويل الدولار خو كلما يموت الكم ميت، تروحون للجوامع تحثون الناس تكثف بصلاتها الدعاء بلكت ما يموت شيخ برمضان.