هسه لو نعرف ايران ليش ضربت أربيل، وبالذات بيت التاجر الكردي دزئي وتسببت بمقتل العائلة كلها والخطار.هل هو فعلا مقر للموساد الإسرائيلي؟
ومعقولة الموساد تسوي مقر ببيت تسكنه عائله معروفة، طابين طالعين عليها الخطار، واذا الموساد هلگد ميانه ويه الإقليم چان تگدر تسوي مقرها باماكن محميه ما ترصدها لا ايران ولاربعها. وإذا الموساد هلگد مأذيكم خو اضربوا مقراتهم بإسرائيل.لو هل هو يتاجر بالنفط الكردي ويه إسرائيل؟واذا يتاجر فعلاً، فمعقولة التجارة الممنوعة تستحق صواريخ،ومعقولة دولة اجنبية تعاقب مواطن لدولة أخرى والله شنو يتاجر ويه عدوها، ومعقولة ايران نست أنها سبق وان تاجرت ويه اسرائيل أسلحة وأدوات احتياطية وعتاد.لو الضربة الها علاقة بالمعارضة الكردية الإيرانية، والحچي الدارج يگول الحكومة أجبرت المعارضة المتواجده على الحدودأن ترجع ليوره قريب من المدن وسوتلهم مناطق إيواء وبدوا يگعدون بيها، فعلويش هالضرب.لو هي رساله للأكراد تره محد يگدر يحميكم حتى الأمريكان فلا تچلبون بيهم، وخلهم يطلعون؟عموما حجج إيران ومهما تكون غير مقبولة، تضعف العراق وتخرق سيادته، وتحرجه گدام العالم وتدفعه هو أقرب حليف الها أن يعيد سياسته منها، ومن كل المنطقة حتى يعيش بسلام.