هسه لو الوزيرة مسويه شي محد مسويه من گبل چان گلنه هاي الأناشيد والاغاني الي سووها الها والرياجيل الي تگمز داير مادايرها مثل الشوادي تستحقها، وتستحق يسوولها تمثال بباب الوزارة.لو السيد النايب من صدگ نايب، ومشرّعْ قوانين بيها حظ وفايدة للوطن والمواطن ومحد من النواب مشرعها من گبل هم چان گلنه غنوله وإرگّصوله، وشيريد سووله.ولو السيد المدير العام صدگ حوك وگدها وجابها بذراعه، چانگلنه إدبچوله وهوسوله وشتريدون سووله.موجه هوبزه واستعراضية وخفية ركبوها قسم من المسؤولين مالهذا الوكت، بطريقة توحي وكأنها:تقريباً مثل ذيچ الطريقة مال ذاك الزمان، والي مسويها عبالك واحد مدومن على الزمانين، والموسيقى واللحن والأداء مثل ذيچ الموسيقى ونفس ذاك الأداء، خلت المسؤول بالزمنين چنه فسيفس نافش ريشه.الفرق، فسيفس مال ذاك الزمان چان واحد ينگر، وبهذا الزمان صار الف فسيفس بس منظر بيه نافش ريشة.المشكلة ليش أحد گاللهم ولكم عيب، هاي شغلات مزعطة.وليش أحد گدر يحاسبهم ويگللهم اشگد صرفتوا على انتاج هيچ أغاني واناشيد بايخة من المال العام.وليش الناس بطلت تنتخبهم، وتگول الفسيفس والشادي مايصلحون يمثلونه.