كنا كل الوكت الي مر وانتهى نلوم نفسنه على أساس إحنه غلط،ونلوم حكوماتنا على انها أصل الغلط ضعيفة، وطرهات، تبين موبس إحنه غلط، العرب والمسلمين أغلبهم مثلنا غلط، لأن:بحرب إسرائيل على غزة تجاوزت بيها كل الحدود، والقوانين الدولية ومشت بطريق التدمير الكامل للمدينة، ودولنا عاجزة عنالتعبير حتى عن موقف عتب على اسرائيل، وعلى الأمريكان والأوربيين الي أيدوها وساعدوها وانطوها الشرعية دا تستمر بسلوكها التدميري.كل الي طلع من العرب مناشدات أن تلتزم إسرائيل بقوانين الحروب، يعني:اضربوا واستمروا اضربوا بس مو حيل، يمعودين مشوها اشويه،اشويه وانتم توصلون الي تريدوه، مواقف إجتي من:
الضعف، الي احنه سويناه بنفسنا لنفسنه، ومن:فرقتنا، وكذبنا، وتمسكنا بالماضي، ومن:كونا ظواهر صوتية (نگب، ونهوّس، ونتظاهر وبعدها نسكت،ونذبها على الله ونگول هذا المقسوم)، واجتي من:القسوة والهمجية الي بداخلنا من نقاتل ونتفوق بأول هده نفقد، مانفرق بين مدني وعسكري، ولا نعرف نتعامل مع موقف قتال يالعالم كله يتفرج عليه، ويكوّن مواقف من عدنا ومن قضايانا بسبب تصرفاتنا بساحته المحكومة بقواعد وقوانين.مع الأسف بسببها راح نبقى ضعفاء ومكفخه، ويا خوفي يجي يوم تسود بيه إسرائيل المنطقة، وما تبقيلنه غير الدعاء والجمعة المباركة.