6. حمايات المسؤول بالخارج


حمايات المسؤولين وأولاد المسؤولينفي عراقنا الجديد مشكلة تنضاف لعشرات، ويمكن مئات من المشاكل الي حلها صعب ويمكن ما الها حل بهذا الزمان وبالقدرات الموجودة لأهل هذا الزمان، وتاليها الناس بزعت وطلعوا مظاهرات،وصاحوا بأعلى الصوت عمي خلصونه منهم لأنهم من يتوازونگاموا يعتدون على الناس، ومن ينحصرون يمشون عكس السير، ومن يستعجلون يكسرون الاشارات المرورية، لكن كود المسؤولين يديرون بال، أبداً ولا چن الوادم تحچي وتطالب.

وفد يوم من الأيام چنه گاعدين ودانحچي بهاي المشكلة نب واحد وگال أگلكم صدگ أنتو بطرانين، ومن گناله ليش گال يمعودين دطلعوا برة يعني خارج العراق وشوفوا بعينكم،حتى هناك وصلت الحمايات، قسم يروحون ويه المسؤول وين ما يروح، وتشوفهم أول ما يصعدون للطيارة خاصة إذا چانت عراقية يخنزرون على الركاب ويباوعون على الناس صفح، وهمه حرام اذا بيهم فايدة، لان لا مدربين، ولا اسباع ويعرفون شيسوون إذا صار اعتداء على المسؤول.الله وكيلكم بس خساير فلوس على الدولة،لأن مرة واحد مسؤول كلش چبير حمايته تعاركوا ويه عراقيين اثنين گاعدين بالدرجة الأولى للطيارة الأردنية. وبس الجماعة شمروا عن سواعدهم وضربوا الحماية رأساً گعدوا على صفحة ولنهم يندارون على المسؤول بوكسات، وهم زين تدخلت الحماية مال الطائرة الأردنية وخلصوا أخونه المسؤول، والا چان راح بيها وحمايته يتفرجون.

أگول بروح ابهاتكم متگلولي لعد شنو فايدة الحماية.

عمي، خلونه نعوف الحمايات داخل العراق لأنهم گرايب وولد عم وخلونه نطلب من الحكومهتمنع المسؤولين ياخذون الحماية وياهم من يسافرون، لأنهم بس كشخة.